投資者日記 表哥表嫂炒二線股

lewin

投資者日記 表哥表嫂炒二線股

　　5月29日，周二。恒生指數跌60.17，收20469.59；成交五百三十九億九千三百多萬元。5月期指收20448點，跌60點；6月收20511 點，跌61點。大福資產管理Nancy Lee認為，部分投資者試圖鎖定獲利來規避風險（例如沽出普通股、用10％資金買輪）。政府每逢賣地股市例跌，何況屯門青發街住宅用地以七億八千萬元賣出，較分析界事前估計嘅八億零八百萬元略低。

　　新上板嘅百麗國際（1880）跌1.4％。近日新股上市定價已偏高，上市後高追制唔過，不如留番D錢炒二線股好過。花旗指近期港元滙價較弱，代表有資金外流，估計銀行將喺一至三個月內加息，並估計今年第三季九十天期拆息將升上四厘六至四厘七，令銀行息差再縮窄。今時今日，本港銀行嘅利潤已不能只依靠息差賺錢，紛紛加入財富管理項目，向客戶推銷產品賺手續費。炒輪者捨輪從股

　　內地投資者人數首次打破一億，總數係一億零三十萬。滬深三百指數今年以來已上升一倍！工行開始出售第一個投資境外股票嘅QDII產品，但內地人更快一步。

　　聽講唔少內地表哥表嫂早已响五一黃金周來港開戶，將內地嘅炒股技巧用於香港二線股，形成5月份香港二線股唔少變成北韓火箭─—只要資金湧到股價立即狂升。今天二線股市場有如長洲搶包山（爬得愈高，D包分數愈大）。利之所在，過去唔少炒輪者亦加入炒二線股行列。

　　1997年7月1日香港主權回歸後，各省市同香港來往必須透過港澳辦協調，只有廣東省例外，因為廣東省同香港有一個合作機制，叫做粵港合作聯合會議。此外，2004年深圳市市長李鴻忠訪問香港時，同現任特首佘當奴簽咗「1加8」協議，共九個合作文件。呢個協議令深圳有關各局與香港特區相關部門建立合作機制。

　　今年2月佘當奴發布政綱時話，為香港設計嘅其中一個方向係與深圳建立合作夥伴關係，與深圳攜手打造國際大都會。作為國際大都會，香港不但土地面積唔夠，人口亦不足；不過，香港加深圳嘅面積一下子擴大到三千平方公里、人口二千萬、GDP二萬億，兩個機場吞吐量達四千萬人次，港口吞吐量四千萬個標準箱，喺亞洲區便一下子超過東京，甚至遠遠拋離上海！

港深一體化係大方向

　　如再加上去年4月拉菲爾警告香港可能會被邊緣化，而且近日一再有消息傳佢留任，相信吸引佢留低嘅唔喺西九，而喺香港同深圳實現城市一體化。皇崗口岸二十四小時通關、新口岸設立、深圳灣口岸一地兩檢、香港國際遊客進入深圳七十二小時免簽證等，西部通道、銅鼓航道、深圳河治理、深港地鐵對接、穗深港高鐵等，深圳1980年起根本上係香港嘅後花園，一步步走向香港加深圳應係順理成章嘅發展。建立一個超級大城市，可一下子超越東京，亦拋離上海威脅，不但兩地互補其短，而且競爭優勢迅速強化。利用深圳來自五湖四海嘅人口，迅速建立全國各地人脈關係，成為全國投資、內貿強大網絡；而利用香港國際關係，亦令深圳進一步提升。

　　此外，港交所可逐步改造深交所，或互相交叉揀股、結成利益共同體，進行細分工，令香港金融市場一下子同內地資本市場整合，為投資者提供更豐富嘅產品選擇，並為人民幣國際化鋪下平坦之路。

　　當然，由今天一國兩制、五十年不變，去到港深一體化，要走嘅路仍十分漫長，但上述應係香港發展嘅大方向。

　　英倫銀行誓言遏制英國通脹率，睇嚟英鎊仍然會加息，問題係6月抑或係8月，然後係11月；估計今年內英鎊會加息兩次。即後市英鎊滙價睇好。

　　美國十年期債券孳息率由2月底四厘四八升至5月中嘅四厘六五，估計下半年可升至五厘二五，扭轉美國孳息倒轉嘅環境。因為不但中國政府，連美國投資者亦漸漸對十年期債券嘅回報率失去興趣，資金由債券市場流出找尋其他投資項目。

　　高盛估計，印度需求上升及澳洲港口瓶頸問題，可令明年焦煤價格上升22％，由今年每噸九十美元升至明年一百二十美元（之前估計焦煤價會跌至九十美元）。印度係全球第三大焦煤進口國，今年進口量達二千五百萬噸（去年二千一百萬噸）；反之，澳洲可能減少出口，因為昆士蘭州港口擁塞，限制該國嘅出口能力。換言之，煤礦股仍有得炒。

　　恒生指數O不足十六倍，但面對企業純利增幅見頂，因此投資者唔打算付更高O去吸納藍籌股，令恒指至今仍喺18500至21000點間上落。人行應向聯儲局學習

　　1997年7月香港主權回歸後，由於選擇多，理論上賺蚊年嘅機會較1997年多咗，點解中產階級反而有80％較1997年7月貧窮？證明做選擇唔係想像中咁易。每天來自各大報章、電台、電視台及其他財務顧問嘅意見，許多時反而令大家花多眼亂，揸唔定主意；如再加上網上文章，真係一天二十四小時都唔夠用，同時證明太多資訊唔一定有幫助。

　　能夠改變你生活方式嘅，唔係點樣賺取10-15％利潤，而係點樣喺短時間內賺取100％甚至200％利潤，上述係二線股點解咁吸引嘅理由；但能買中升幅一倍以上嘅二線股唔係想像中咁易，往往誤中副車。因此炒二線股不宜重鎚出擊，應該輕身上路。

　　至今為止，中國喺辦公室工作嘅員工，有一半以上已有股票投資戶口；19％承認對股票有一定認識、56％承認對股票認識好表面。就係呢批新股民令內地A股今年上升100％！今天內地A股股價由供求關係決定，因此連專家都無法分析A股動向。

　　所有投資市場一旦快速上漲，出現泡沫係無可避免，問題係作為政府應點樣對待泡沫？最失敗係日本政府，開始時候冇任何動作，決定之後動作又太猛烈（1989年6月至90年6月日圓利率由二厘五提升至六厘半，讓日圓大幅升值），結果受害亦最深。使用非常強烈嘅抑制泡沫貨幣政策，當然能成功刺破泡沫，但同時換嚟十三年經濟衰退及日本銀行不良貸款急升。

負資產傷害要一代人時間治癒

　　第二個泡沫係亞洲金融風暴，其他國家唔使講，就以香港為例，1991年外資開始大量湧入，由於七點八，令香港進入負利率期，但係政府對銀行貸款採取非常嚴格嘅限制；至於房地產市場，受制於每年賣地五十公頃嘅制約，因而動彈不得。1997年8月泡沫爆破後，本港銀行界除咗一間之外（呢一間銀行嘅問題同香港經濟無關），其餘全部冇問題，證明1991至97年金管局嘅工夫做得非常足。可惜新上台嘅特首唔明白經濟運\作，每年賣地五十公頃政策到期後，便急不及待推出八萬五房屋政策，累及香港樓價回落65％，並為香港帶來六年通縮。好彩香港銀行貸款呆壞賬唔多，2003年下半年喺內地自由行協助下恢復繁榮。只係因樓價回落65％所造成嘅傷害，令全港中產階級有80％窮咗，上述傷害相信要一代人嘅時間才能治癒！

　　第三個泡沫係1996年12月美國科網泡沫，格蛇雖欲制止，但面對1997年亞洲金融風暴、1998年俄羅斯債務危機及1999年千年蟲問題，直到 1999年下半年才逐步抽緊銀根。2000年第一季科網泡沫爆破，佢2001年1月立即放鬆銀根。至今科網泡沫嘅破壞力只局限於科網行業。美國樓市方面，自2004年6月至去年6月美國已逐步抽緊銀根，相信最後結果亦只局限於房地產業，唔會擴散到其他行業。

　　中國人行應學習美國聯儲局嘅方法。例如2003年內地樓價開始上升，2004年國家已推出一連串宏觀調控。2005年6月股市回升，2006年6月人行亦開始逐步抽緊銀根。不過，人行亦有某方面嘅局限性，就係人民幣不能自由浮動，情況有如獨臂刀，只能單手應付泡沫而非雙手。呢方面香港金管局有值得向內地學習嘅地方，就係喺泡沫期嚴格限制銀行貸款進入樓市及股市，以免日後變成呆壞賬。至於小投資者則必須教育佢地，等佢地明白輸贏必須自負，唔好輸咗要政府賠。

　　前特首另一錯誤決定係向倒閉證券公司嘅客戶賠錢。證監會亦應加強對上市公司及證券公司監管，增加佢地嘅透明度、打擊造假、加快推出對沖工具，以免出現單邊市。香港近年推出大量衍生產品後，令股市短期波幅擴大，但長期波幅收窄（因為有衍生產品作緩衝區）。市場要成熟，必須引入機構投資者及世界上知名嘅衍生產品發行機構。人皆好賭，對應方法係讓佢地合法地賭博，並教育市民明白賭博風險所在，而非禁賭。中國禁賭已有幾千年歷史但中華民族卻係全球上最好賭嘅民族！賭係禁之不絕，反而有正常途徑去賭才係辦法；至於病態賭徒係本身有問題，同社會係咪容許賭博無關（澳門開賭，澳門病態賭徒反而較香港少）。

　　內地五花腩已漲到十九元一公斤，較月初升39.7％、較上周升5.7％；瘦肉二十六元一公斤，較月初升62.5％、較上周升18.2％，升幅大於本月A 股指數！中山大學嶺南學院副院長李勝蘭教授認為，肉價上升係前幾年各種因素累積。前幾年豬肉利潤率唔高，加上口蹄疫等大大動搖農民養豬嘅積極性，唔少農民放棄養豬，改為入城打工。依家養殖戶睇到價格上漲，開始再養豬但供應難以一下子增加。估計內地豬價高企仍會維持半年左右，明年才有較大調整。近日生豬批發價七元一斤（市斤）供應已漸豐富，估計零售價亦漸企穩，唔會進一步上升（註　兩市斤等於一公斤）。

　　本周菜心價升一倍（上周一元五角一市斤），本周三元。生菜、油麥菜亦升到二元。菜心批發價由八角一市斤升到二元，主因係暴雨天氣影響。

　　大頭魚、草魚、鯿魚、鯪魚批發價亦漲價，但零售價未見變動。開刀大頭魚每斤六元五角、開刀草魚每斤八元。

　　今年第一季港人喺深圳置業佔外銷物業65％，其中34％因工作上需要、31％係投資。由於西部通道即將通車，加上深港加強商業合作關係，更多港人因工作需要而到深圳置業。呢批置業人士80％年齡喺三十一至五十歲，其中三十一至四十歲佔45％。家庭入息三萬元以上佔36％；大學以上教育程度佔39％； 50％係專業人員、行政人員、自僱人士及商人。換言之，今年北上置業者已非退休人士，而係本港中產階級。

歐盟為吸引企業爆減稅戰

　　從1997至2005年日本企業為逃避對員工嘅責任，舊員工辭職後通常以兼職員工頂替，同時工資低10％。今年首季兼職員工佔勞動人口市場33.7％（去年第四季32.9％）。日本勞動局報告，今年每三個員工中有一個係兼職，十年前五個中只有一個。上述係日本企業節省勞工成本嘅方法。日本戰後嬰兒大部分喺1947至49年出生，今年起往後三年係呢批員工退休高潮，相信日本企業會聘請更多長期員工而非兼職員工頂替，呢個亦係日本失業率跌至九年內低點嘅理由，相信日本工資開始止跌回升。

　　歐盟國家為吸引企業投資而爆發減稅戰。依家稅率最低係愛爾蘭，稅率由1988年47％一直減到今天 12.5％，相信係全球最低稅嘅國家，令微軟、英特爾、戴爾電腦都到愛爾蘭投資，不但令愛爾蘭GDP增長率三倍於歐羅區其他國家，同時過去十年有九年財政出現盈餘。低稅率吸引企業投資，帶來經濟繁榮，新加入東歐國家亦採用呢個方法，令歐盟其他成員國（稅率平均26％）面對威脅。英國計劃將平均稅率由28％減至26％、德國計劃由39％降至30％、法國計劃由33％降至28％、西班牙由35％降至30％。2004年波蘭稅率由27％降至19％、斯洛伐克由 25％降至19％、匈牙利由18％降至16％。低稅率國家將企業投資由高稅率國家搶走；唔單止咁，低稅率亦有助企業提升效率，結果錢賺多咗，畀稅反而更多。

　　日本商界亦希望政府將稅率由家吓40％降至30％去刺激經濟。

　　中國企業稅率將由過去35％逐步降至25％，可刺激內部企業加強投資；反之，外資企業稅率由15％逐步提升到25％，將大大減少中國對外資嘅吸引力。以今天全球稅率水平，上述稅率唔見得有吸引力，相信中國QDII將逐年下降。
信報財經新聞      曹仁超2007-05-30