投资者日记 人人期待恒指创新高

lewin

投资者日记 人人期待恒指创新高

　　5月6日，周日。五一黄金周本港唔少商店延长营业时间到深夜十二时，以吸收内地自由行嘅购买力。由于内地股楼皆升，内地人十分疏爽，相信本港零售业受惠唔少，但会否引发一轮投资本地零售股潮则木宰羊。由于周一系五一黄金周假期，一般估计，五一黄金周后内地Ａ股会继续高开。人人期待本周恒指打破1月24日高点20971.46，好友发现今年仲系佢地嘅世界，并开始质疑SeII in May嘅传统智慧。去年高潮喺5月、低潮喺6月；今年高潮喺1月、低潮喺2月？过去四年唔少人嘅资本上升一倍、两倍甚至三倍。金、铜、煤、油及天然气股都为投资者带来丰厚利润，去年内地金融股表现亦好出色，今年又点？无论乜嘢时间，总有Ｄ项目出现牛市，问题系你搵唔搵到。

　　地球表面70％由水覆盖，但只有其中温巴仙嘅水可以饮用！如我地能够好好利用沙漠，亦可变成绿洲。

投资水源未来利润可观

　　淡水成为愈来愈重要嘅资源，今天投资水资源一如五年前投资石油股一样，相信未来五至十年可为投资者带来可观利润。拣行业（sector）愈来愈重要！

　　以过去五年为例，表现最出色行业系能源，其次才系房地产，第三系银行、第四公用、第五金融保险、第六原材料、第七零售业；表现最差者有传媒股、计算机软件股同建筑股。虽然香港经济复苏已有四年，上述行业未见受惠（或受惠有限），例如报纸受免费报纸打击，无论壹传媒（282）、东方报业（018）股价亦唔见得出色；有线宽带（1097）受now抢生意，影响亦大。最近查氏家族入股ATV，未来电视广播（511）前景点睇？有竞争才有进步。不过，竞争激烈嘅公司业绩一定退步，任何竞争过分激烈嘅行业，前景都唔明朗。但未来系不可预测嘅，例如六十年代最备受睇好嘅美股系通用汽车，但去年通用汽车纯利主要来自财务公司GMAC，至于汽车制造业早已成为无利可图嘅生意。苹果计算机凭着iPod及iPhone，过去四年股价由六美元升到一百美元！1989年全球分析界睇好日本，中国因受**事件打击，人人睇淡；今天日本须依赖出口产品到中国市场去拖动GDP增长，中国股市则面对过热。上述种种都告诉各位，人系冇预测能力嘅，例如内地A股由今年1月起至今，几多分析员一再认为偏高，四个月过去，A股指数不但冇回落，反而再升50％。普通人只见开花结果，有智慧嘅人才会寻根问底。今天美国 GDP 80％来自服务业，其中70％同消费有关；服务业同消费业较少受经济盛衰影响，唔同制造业，一旦面对存货过剩，公司纯利便急跌甚至出现亏损。服务业同消费业都系纯利较稳定嘅行业，此乃1982年起至今美国经济再冇出现衰退（即连续两季GDP负增长），只出现两次软着陆，即1990年首季及2001年第三季（GDP出现一季负增长）。去年5月贝南奇所鼓吹嘅黄金岁月，即经济不太热亦不太冷，至今为止经济仍然系咁。

　　中国人同日本人有好多相似嘅地方，例如努力赚钱（hard earn money）但创富能力低（make money），因此只有制造业表现出色。美国人却系创富专家，例如微软公司创造咗几多财富？近年苹果亦创造唔少财富，仲有Google……。

　　中国人喜欢强调中国GDP高增长，以中国去年二万亿美元GDP计，增长10％，亦只系增加二千亿美元；美国GDP十二万亿美元，增长3.5％系增加四千二百亿美元！十三亿人口多赚二千亿美元叫高增长，三亿人口多赚四千二百亿美元叫低增长？

股市症候群睇得通才可免疫

　　过去四年全球各国央行货币供应增长率达年率18％，响咁高速货币供应下，唔出现全球资产大幅升值才怪，此乃2003年全球至今经济繁荣嘅背后理由。根据奥国经济学派理论，透过增加货币去刺激经济增长，只系扭曲经济，迟早由资产升值转为资产贬值，经济出现Boom & Bust无可避免。1985年《广场协议》G7迫日圆升值，日本银行唔服而滥发日圆去减慢升值速度，同时宣布减息以阻止外资流入，结果引发日本泡沫经济，前后四年多时间。1990年美国经济出现软着陆，美元回落兼减息，香港为阻止港元升值，不但将利率降至通胀率之下，同时多多都兑换美元（有几多美元流入，香港便发几多港元）。低利率及信贷大幅膨胀，令香港泡沫经济维持咗七年，泡沫到1997年8月才爆破。2001年1月美国联储局因担心通缩而将利率由六厘二五降至一厘，美元汇价受殊仔宣布大幅减税产生财赤及贸赤影响而贬值，资金大量流向中国、印度及其它新兴市场。中国政府同样宣布减息及多多兑现人民币换美元，去阻止人民币升值；2003年起内地楼价上升、2005年起内地Ａ股市价狂升。至于可维持几耐？冇人知道。奥国经济学派只话畀我地听：政府咁做经济必出现Boom & Bust，至于时间会几多耐？日本系四年半、香港七年，中国则木宰羊。

　　在中国股民大扩容时代，股市症候群迅速扩散，只有睇得通嘅人才可免疫。股市症候群与恋爱症候群相似，例如经常患得患失；一时欢喜若狂，一时又痛彻心扉；有时火爆有时又情绪低落，即使赚到蚊年，只要别人赚得较自己多，已经唔高兴。热恋时期之人，一日不见如隔三秋；股市症候群亦一样，一天不谈股便觉得生活乏味。办公时间偷偷睇股票行情者众（一如热恋中嘅男女去洗手间讲电话一样），男男女女三五成群大家交换股票贴士，搞到茶饭不思甚至疯狂购物。炒股同恋爱一样，大部分系盲目嘅，只有理性嘅人才可搵到好伴侣，经常换画者最后必失恋收场。内地A股泡沫冇人知呢段日子可维持几耐，未来调整幅度几大及对中国实质经济影响系点？今天中国GDP全球排名第四，并拥有全球最大外汇储备，因此如中国出事，一定影响全球，但又唔知影响有几大。同日本、德国唔同，佢地一度被美军占领，美国可迫日圆同马克升值；中国系拥有100％主权国家，毋须畀飞士美国，唔会响美国压力下调整人民币汇价。换言之，1985至94年喺日本出现嘅情况（日圆由240兑1美元升至79日圆）一定唔会响中国发生，但唔代表类似1990至2003年港式经济情况唔会喺内地重演。中国同香港唔同，至今中国仲系有外汇管制嘅国家，资金流入容易流出困难，1990至97年港式经济泡沫亦唔可能喺中国重演。至于出现1997－98年式国际大鳄羣起攻击港元汇率制度，喺中国更加唔会出现。

中国经济泡沫系一次全新体验

　　展望未来，估计人民币仍保持年率6％速度上升（一如2006年），因此中国泡沫唔同日本泡沫，亦唔同香港泡沫，唔好硬把日本1985至2003年嘅情况套入中国，亦唔好用1990至2003年港式泡沫去预测中国。中国经济泡沫表现系另一次全新体验。中国经济可否避免Boom & Bust结局？随着经济环球化，经济盛衰周期愈来愈长，行业盛衰取代整体经济盛衰。美亚证券分析员响4月16日发行嘅《福布斯》发表意见，认为从可靠数据睇搵唔到衰退嘅影子，喺可见将来（或整个2007年）出现衰退嘅机会接近零！

　　深圳去年买楼置业者，超过30％喺获得产权证后半年内转手。深圳蓝皮书《中国深圳发展报告2007》话，深圳登记在册商品房产权人数一百零九万五千人，其中87.39％只拥有一套住房。获得产权证后半年内转手者占30.31％，三年或以上才转手者占28.11％，证明炒家所占比重仍然相当大！

　　深圳居民可接受住房单价系六千至八千元一平方米嘅占25.64％、八千至一万元一平方米占17.52％、一万至一万二千元一平方米占16.67％、二万元以上占14.53％。市民对楼价一升再升已产生抗拒。广州住宅3月份租金较2月份升0.75％，系连续下跌六个月后首次止跌回升；3月份住宅租金指数1079点，较2月份上升8点；一房一厅月租一千二百七十五元、二房一厅一千六百一十二元、三房一厅二千四百元。五一期间所作调查，49.07％广州市民相信未来租金同楼价续升。国际公认租售警戒线系一比二百（即楼价高出二百个月月租便好危险），依家北京、深圳、上海租售比达一比二百七十至一比四百，早已过咗警戒线。

　　1997年贝理雅上台之时，英国住宅物业平均只卖六万八千七百七十七英镑一间；今年佢下台时，英国住宅物业平均售价十九万二千三百一十四英镑，升幅接近200％。今年英国物业升幅普遍放缓，只有伦敦例外，例如Belgravia区（伦敦海德公园附近嘅高尚住宅区）今年升幅已达50％。一如香港情况，普通住宅楼价已止升，但豪宅仍在狂升！理由系富者愈富。另一方面，今年首季超过三万人宣布破产或寻求IVA（个人债务重组），证明英国同时出现贫者愈贫。上述已系全球现象！理由系OECD国家嘅低收入工作职位转移到发展中国家如中国同印度，令OECD国家富者愈富、贫者愈贫。
信报财经新闻      曹仁超2007-05-07