投资者日记 未来Ｈ股发行价劲贵

lewin

投资者日记 未来Ｈ股发行价劲贵

　　3月23日，周五。恒生指数升2.39，收19692.64；成交四百三十亿元。3月期指跌46点，收19699点，下周系期指结算。本周港股升3.9％，系去年4月7日以来升幅最大嘅一周。

越南股市狂潮甚于中国Ａ股

　　越南股市指数去年上升145％，今年再升56％。越南人已疯狂投入炒股行列，媲美1972－73年香港。无知股民响证券行内遇上有人兜售未上市嘅股票，亦一样够吉士买。喺越南，OTC唔系代表场外交易，而系代表over the cafe-table；好多不见经传嘅股票喺咖啡室内出售畀投资者，到底呢Ｄ公司做咩生意、系咪赚钱？一概不理，只要系股票已有人买。

　　越南股票市场开业才七年，过去唔少不知名股票变成「上市公司」。今年越南成为WTO成员，传有二百亿美元资金计划进入越南，人人唔想错过发财机会。越南嘅情况已超过1973年嘅香港，最相似系十八世纪伦敦「南海泡沫」时期，当时「South China Sea」股票便喺伦敦咖啡室内买卖。越南股市去年初总市值四亿美元，依家已升至二百二十亿美元，政府同IMF成员都好忧心，一旦外资获利回吐，跌幅肯定媲美1973－74年嘅香港（1973 年恒生指数由1774点跌至1974年150点，跌幅系91.5％）。依家越南二十只最一流公司平均O系七十三点五倍，较上海A股三十六倍又高出一倍！响越南嘅汇丰银行Alain Cany认为，越南本地银行唔负责任系咁借钱畀人炒股，系造成呢次狂潮嘅理由。佢建议越南政府抽「资本升值税」，以及将更多国企上市……。睇嚟最大股市泡沫唔系中国，而喺越南！

　　花旗建议购入中国银行（3988）、中银香港（2388）、中海油田（2883）、平安保险（2318）、国寿（2628）、中保国际（966）、中国财险（2328）及中海油（883），即花旗全线睇好内地股。

　　瑞银、高盛、大摩已透过合作方式，响内地大做A股IPO（今年首季内地IPO涉及金额已超过香港IPO）。摩根大通及美林寻求进入内地A股IPO嘅机会，相信今年内地A股IPO涉及金额将超过香港，令香港作为中国金融中心嘅地位受威胁。

申请IPO者将冇啖好食

　　过去国内企业系先发行H股来港上市，然后才发行A股回国上市；未来将系先发行A股，然后才来港发行H股，一旦如此，未来H股发行价将劲贵，令本港申请IPO者冇啖好食。

　　1997年白眉董上台时仍夸耀香港系中国八大「中心」；十年后，今天畲当奴竞选连任时，能提得出嘅「中心」只得番三个。2017年又点？一如十八世纪伦敦取代阿姆斯特丹，香港金融中心地位已开始受上海、深圳威胁，担心十年内失去嘅机会十分大，到时香港经济将无以为继。生于忧患，死于逸乐。过去十年内地经济已翻几番，香港GDP则原地踏步。以香港作为「中心」嘅行业，一个接一个被内地城市抢去，依家只余下三个，一旦人民币外汇管制取消，香港连最后堡垒（金融中心地位）亦拱手让人。各位睇睇今天本港上市大企业，边一家投资矛头唔系指向内地？

　　根据一份国际管理咨询公司研究，中国家吓最欠缺嘅系中级管理人才，尤其系嗰Ｄ拥有国际视野嘅。中国尽管人多，但合资格嘅管理人才自九十年代开始便出现短缺，而且愈来愈严重。过去美国大企业搵ABC（American-Born Chinese）去中国做事，虽然佢地睇嚟似中国人，甚至晓讲普遍话，但思想上早已美国化，到中国办事已无法适应中国式做事方法（类似美国西部牛仔时代，即介乎守法与不守法之间；加上官僚如非贪污就系缺乏效率）。近年美国大企业改为聘用嗰Ｄ由中国到美国受教育或台湾出生、喺美国受教育嘅返中国做事，佢地英语一流，工余又可陪客唱K，甚至懂得唱国语歌，可以同当地官员打成一片；反之，香港人太纯洁矣，回国做事反而格格不入，犯紧过去ABC同样嘅错误，你说怎么办？

　　去年日本地价出现十六年内首次上升，东京、大阪、名古屋地价更出现第二年上升，即2005年上升1％、去年上升2.8％，因为日本出现战后最长嘅一次经济复苏（由2003年开始，去年第四季GDP升幅更达5.5％），相信日本已结束漫长通缩期，但系咪进入长期牛市又作别论。　　中国已全力向高科技产品进军，例如个人计算机，流动电话方面已成为最大生产国，并计划大量投资芯片生产。中国渐渐由低工资经济走向高工资经济，由劳工密集型经济走向资本密集型生产；不但生产大量DVD及电子消费品，同时进军造船业、汽车工业，甚至航空业（例如制造飞机）。中国出口产品迟早威胁日本产品响国际间嘅市场。中国低工资制造业估计渐由印度取代，中国自己则走向高工资制造业，令南韩及日本产品嘅领先地位受到威胁。过去中国低劳工成本制造业为唔少企业带来高利润，加上中国银行手上有大量资金，足够信贷支持内地企业走向高科技制造业，何况仲有税务优惠。即使钢铁业，亦由过去生产粗钢为主，改为生产特殊钢，喺内地已迅速取代特殊钢入口地位，估计有一天将成为中国嘅出口产品。

中国高科技产品将追上日韩

　　中国改革开放政策已二十八年矣，第二代制造业人才正进入市场（即受较高教育水平嘅工人），再唔系八、九十年代嗰Ｄ冇技术嘅工人。未来二十年中国产品同日本、南韩产品之间技术差距在收窄，而价钱却较日本及南韩产品便宜。响上述理由下，我老曹认为日本未来经济好唔得去边！

　　美元利率期货市场反映，第一次减息将喺6月出现，以后再有两次减息机会，即年底见四厘半。仲记得去年分析界曾估计今年初减息吗？美国经过长期资金泛滥后，理论上需要一段好长好长嘅日子才能完成「退潮」。虽然贝南奇担心经济出现衰退，但佢更担心滞胀（1970至80年美国嘅情况）。如其它行业不受美国楼市回落影响，相信佢仍然，唔会咁快减息！因为贝南奇知道，稍一不慎，商品价格及工资成本随时涨过不亦乐乎，如非必要，都系让利率保持现状最好。

　　理论上，美国经济系可以出现衰退嘅，但真实情况并唔容易。引发美国经济衰退唯一可能系美债孳息率大幅上升，上述可由日本结束利差交易引发，但各位信唔信日本银行会咁做？其次系中国人行大手抛售美债，中国政府亦冇理由搞串个派对，事关美国经济如衰退，中国先受其害。基于上述假设，相信美国未来经济唔好唔坏，此所以我老曹认为贝南奇嘅黄金岁月论有条件一直保持落去。

联储局减息亦帮唔到次按者

　　美国由2004年中开始，经过十七次加息，利率才升到五厘二五，去年金价同油价刚受控制。今年减息传闻已令5月期油升上六十一点六九美元、天然气见七点三二美元每一百万焦耳、金价见六百六十四点二美元。假如美国真系响6月减息，商品价格会点？换言之，减息论相信只系fat tongue（贪口爽）。世界改变咗好多，美国十年期债券孳息率四厘五九、三十年期债券孳息率四厘七八，唔系代表银根好紧（过去短息高于长息，代表联储局收紧银根）。近二十多年，多咗日本及中国呢两个大国揸住大量美元，日本人同中国人皆有良好储蓄习惯，两国大量外贸盈余回流美国买债券，造成美国长债孳息率反而低于短期利率；如以为系美国联储局抽紧银根，其实系一场误会。事实上，去年第三季联储局回购债券速度达年率六千零六十三亿美元（或年率26%），即美元供应仍极之充足，此乃下半年美股继续上升嘅理由。依家美国正面对中国人行打算重新处理手上一万亿美元外汇（其中绝大部分系美元债券），如美国自己搞唔掂，反令美元汇价带嚟灾难！须知道人民币仍在加息，更何况联储局减息亦帮唔到次级按揭者，而佢地嘅处境系过去三年嘅定息贷款已到期，必须按市场利率计息，形成去年下半年起愈来愈多定息次级按揭到期须支付较高利息，高潮响今年11月。

未有一百万美元的十个理由

　　如果你今天仍然唔系私人银行嘅客户（即拥有一百万美元以上流动资产），理由有：

　　一、你浪费太多蚊年喺追求物质生活上，而冇专注建立自己嘅财富，包括花费太多钱喺时装、化妆品、旅行及购买奢侈品上。

　　二、你对开支冇预算，例如经常利用信用卡贷款去消费而支付高昂利息，而非等到自己有足够蚊年时才去消费。

　　三、你有坏习惯，包括吸烟、蒲酒吧、赌波、赌马，耐唔耐去澳门。喺自己未拥有大量金钱前，早已花掉「种子钱」（Seed money）。

　　四、你冇目标，尤其系财富目标。你宁愿上网玩游戏，亦唔学习财富管理。

　　五、你冇心理准备。例如六十年代我老曹因为未有资本，所以每天做三份工（除返证券行外，将自己投资心得写成文章到报馆发表赚稿费；从证券行放工后替人家子女补习赚钱）。我老曹最初一万元资本就系用呢个方法获得。

　　六、你太欢喜炒短线。例如用一万元去赚三千元，用十万元去赚一万元，而不让利润往前跑，结果赚嘅系「细」钱，一唔小心却输「大」钱。

　　七、你以为别人会为你管钱。你可以咨询许多人攞意见，但决定权仍喺你自己手上，别人系唔会为你嘅金钱做决定，因为最后得失系你自己。你损失，别人唔会赔畀你；你赚咗，亦唔会将利润50％分畀别人。

　　八、你投资自己唔识嘅东西。例如越南股市，我老曹去年虽睇好但冇投资，因为自己不懂。

　　九、你怕输，不明白「止蚀唔止赚」道理。只要心理上准备损失15％投入资金，你已可心安理得地去投资。但太多人宁愿将钱存入银行畀通胀蚕食都唔投资，因为怕输钱，唔明白「小财唔出，大财唔入」嘅道理。

　　十、你根本上冇兴趣拥有一百万美元以上财富。唔少人对赚钱兴趣唔大，身上只要有Ｄ钱便想办法花掉，而冇兴趣学习钱搵钱。宁愿去行街、睇戏、食饭、唱K，连每天睇《信报》都视为苦差，又点可赚得一百万美元以上财产？你唔理财，财点会理你？　　中新集团（563）停牌。
信报财经新闻   曹仁超2007-03-24