投资者日记 畀邓小平讲中
6月10日，周日。今年1月2日至5月29日内地A股上升62％，然后大幅调整，跌幅一度达17％；上周五收市指数已回升唔少，但仍较5月29日低 10.2％，或今年1月至今共升45.4％。内地Ａ股过去十八个月上升三倍，股价一早已由供求决定，而非反映公司真正价值，其中一个理由系内地投资者冇得拣，被迫响唔合理嘅A股市场作投资。港人就唔同，蚊年可投资全世界（反而唔能够直接投资内地Ａ股，当然亦唔系冇办法也）。换言之，本港国企及红筹股股价先至反映该公司真正价值。最终应该系内地Ａ股股价追随本港Ｈ股股价，而非本港Ｈ股股价追随内地Ａ股股价。大家喺分析两者股价前，必须搞清楚两者唔同之处，即内地Ａ股股价只反映供求关系，本港H股股价先至系反映全世界投资者对该股业绩及前景评估嘅结果。港股进入反复无常期
上周美国十年期债券孳息率由四厘九六升上五厘一五。英镑十年期债券孳息率更见五厘四嘅九年新高。全球利率向上，加上企业纯利进入低增长期，将系今年下半年股市必须面对嘅局面。今年1月24日恒指曾高见20971点，之后回落至3月5日18659点。3月5日嗰日唔少人亦曾作出过淡嘅分析，但恒指却由3月5日起回升至5月15日21088点；当有人猜测后市可见24000点时，恒指却回落。
其实，后市早已十分清晰——今年港股已进入反复无常嘅状态，应付之道系拣股唔炒市！至于点样拣股，可以话既容易又复杂，主要系搵出大趋势。
毕非德投资格言：一、永远唔好输大钱；二、永远唔好忘记第一格言。世上大部分有银士都，系利用上述两大格言建立财富；再简单D讲──止蚀唔止赚。自古成功在尝试，爱输才会赢。输唔系乜嘢大件事，问题只在于输几多？我老曹认为系如果输咗投入本金嘅10-15％，一旦超过此百分比便应止蚀离场。至于赚几多？阁下自理。今年你已不能透过投资大蓝筹赚取巨额财富，今年带来财富嘅往往系早期备受忽略嘅二线股。点样利用二线股去赚取巨利？好多时由一个新概念开始。例如2004年中央政府宣布支持造船业，又如去年「十一．五」规划下经济转型，令唔少内地消费股股价狂升。换言之，Think differently about companies系致富之道。
财富系创造出来嘅，唔系赚番来嘅！例如微软成立时，最原始资本只有二万美元，其产品渐渐成为全球个人计算机嘅必需软件，由此可见其市场系几咁大。由此可为微软企业带来几多纯利？令微软股价上升几多？又以近十年苹果计算机为例，由每股四美元升上一百美元，就系因为主席将计算机科技用于音乐录音上，令一个小小嘅iPod可下载过千首歌，完全取代Walkman嘅地位……。近年内地唔少企业努力建立一个庞大零售网，建立自己公司产品嘅品牌地位，佢地都系财富创造者，投资喺呢D财富创造者股份身上，可同佢地一起成长。上述股份系不能用资产净值或O去评估嘅。
如沐春风换成夏日热风
投资就系确认呢D公司嘅未来纯利趋势，喺「十字路口」前购入合适股份。一旦趋势改变，自己嘅资产分配就要重新订定，以达到追求最大利润目的。不要让通胀逐步蚕食掉自己嘅财富，策略上每年只须让财富稳定地增值，而毋须冒太大风险。投资就系找寻明日之星，而非追随过气明星。一个上升周期通常可维持三五七年，其中又以三五年为最多，七年较少。因此当一个大趋势已维持咗三五年便应提高警觉。投资之道就系当趋势形成时加入，趋势结束后退出。投机便唔同，由于要喺最短时间内赚取最大利润，往往有时赢有时输，主要系凭经验掌握短期大市变化。
人生嘅悲哀系当自己五十岁时才面对经济衰退，而失去五十岁前所赚番来嘅房屋、储蓄甚至婚姻；上述情况1997至2003年喺香港出现，至今唔少人犹有余悸。当港人饱受通缩蹂躏之后，2003年起又再面对通胀。初期温和嘅通胀率令人如沐春风，渐渐却变成夏日之炎炎热风，令人烦躁。近期通胀率正推高利率，例如美国十年期债券息率上周五曾见五厘二五，收市五厘一二，人们逐渐感受到通胀嘅压力。
格罗斯2000年用咗二百万美元买入英国邮票，喺今年6月11日公开拍卖作慈善用途，共卖得五百万美元，七年升值一点五倍。佢管理嘅Pimco基金（今年市值一千零四十亿美元以投资债券为主），过去七年投资回报率每年只有6.9％！过去七年邮票升幅跑赢债券？上述唔算得乜嘢，上月史丹利以一百八十万美元购入嘅乾隆皇坐椅，1994年只卖四万三千七百美元，十三年升值四十一倍！随着全球百万美元家财嘅富豪数目以几何级数上升，全球收藏品价值升幅往往十分惊人。
至于全球房地产，各国表现都唔同。1997年伦敦物业只系英国人均收入六倍，香港物业却系1997年港人均收入十八倍；今天伦敦物业系英国人均收入九倍，香港物业系香港人今年人均收入十一倍。今年英国楼价同香港楼价后市皆好难估；反之，内地楼价例如上海已系上海人去年人均收入十九倍。短期楼价升降可由animal spirits推动，但长期趋势建基于理性分析。
香港将由先进变落后
人人讲香港回归十年，我老曹都嚟凑吓高兴。1945年第二次世界大战结束后至1997年呢五十二年，香港有如女大十八变，香港由一个几落后嘅渔港渐渐变成世界超级大城市。但1997年7月1日香港主权回归后，却畀邓小平讲中，「五十年不变」也。以人均收入计，今年港人收入同1997年分别唔大；反之，1978年起中国内地却进入女大十八变期。今天中国已亭亭玉立，相信到2028年中国才完成经济高增长期，香港到时又会点？1985年我老曹去东京，当年认为东京样样都较香港先进；1994年嗰年再去东京，认为东京样样嘢太贵（例如食一只日本龙虾刺身相信只有十二両重，收费约一千二百港元，所以认为唔抵），晚上九点东京街上的士已冇人搭（谂唔到2003年香港街上的士亦冇人坐）。2004年我老曹再去日本，感觉日本已有D沧桑尤其系大阪，感觉上连香港亦不如。
1985年我老曹首次踏足日本，认为佢先进，到2004年感觉日本有D沧桑，中国大陆人响2028年会唔会对香港有同样嘅感觉？九十年代初期内地人来港时，曾赞叹香港嘅经济成就。今天渐感觉香港不外如是（如今上海市容已较香港美丽）；二十年后再来香港，会否认为香港已落后？一如今天到纽约、伦敦及巴黎嘅感觉一样，尤其系巴黎，过去对佢存有太多幻想，去年巴黎之行可以讲几失望，不但房屋残旧、街道狭窄、交通混乱；我老曹认为，巴黎一D都唔浪漫，晚上九时街道已死寂，除咗少数酒吧仍在营业外，街上行人冇乜。一个大城市盛衰周期通常二百年，有人认为伦敦、巴黎嘅全盛期系一百年前，纽约、芝加哥喺六十年代、东京喺八十年代、香港九十年代、上海应喺2010年之后。令人担心嘅系，香港会否由1997年前嘅先进，渐渐变成落后？
信报财经新闻 曹仁超2007-06-11
页:
[1]