投资者日记 经济复苏如食西餐
投资者日记 经济复苏如食西餐5月3日，周四。恒生指数升293.09，收20681.58；成交五百四十四亿三千多万元。5月期指升280点，收20550点。恒基地产（012）升7％，长实（001）升3.2％，新地（016）升2.4％，ASM太平洋（522）更大涨7.9％，瑞士信贷提升其评级。
3月份香港零售业只升5％，至一百八十九亿元（2月份升28.6％），主要系旅游交通只升2.9％，出口亦只升6.9％（2月份升12％）；超级市场销售更下降1.7％，汽车下降5.6％；升幅大者有眼镜升19％，衣服及鞋升14％。
美股走势似好非好
发改委主任马凯认为，1978至2006年中国GDP平均年增长9.67％，远高于同期世界经济嘅3.3％年增长，2004年已成为世界第三大贸易国（估计2007年可成第二大）；经济总量居世界第四位（估计今年超过德国，排名第三）；人均收入由1978年三百四十三元到2006年一万一千七百五十九元，农民由一百三十四元到三千五百八十七元。1978年全国财政收入只有一千一百三十二亿元，去年达三万九千三百亿元。
随着美国GDP增长率放缓及美国楼市进入呆滞期，相信未来美股走势仲系似好非好、似淡非淡，冇大方向；反之，东欧、土耳其、中国、非洲经济在冒升中，可惜我老曹对上述地区唔熟，无法向各位提供意见。
有人估计苹果iPhone手机响明年底将超越微软嘅Windows Mobile平台，但微软CEO鲍尔默却认为唔可能，因为苹果再犯当年Macintosh计算机嘅错误，就系唔向第三方开放。依家苹果iPhone硬件市场占有率只有2至3％，估计明年年底可上升到5％，无法同微软Windows Mobile对抗！近日一百美元一股嘅苹果，未来系盛极必衰，抑或更上一层楼？
好多时经济学家及股票分析员假设经济系可预测嘅。事实上，我地所获得嘅信息好有限，往往犯咗以管窥豹嘅毛病。经济学家预测错误，因而作出错误加息╱减息决定，例如2001至03年美国联储局因担心通缩而将利率降至一厘，今天我地面对嘅却系通胀率回升；内地A股喺股票分析员连续四个月大叫泡沫下，仍然升完可以再升。淡市莫估底，旺市莫估顶，我老曹一再强调把注意力放喺个别股份而非恒生指数身上。即使内地宏调，但GDP似乎愈调愈高，毫无冷却迹象。
唔好信密食当三番
成功嘅投资策略系冒最低风险去赚取最大利润！冇人可以每次选股皆正确，正确态度系一旦发现选股错误便行使止蚀盘，而唔系同佢做人世；反之，如选股正确，又何妨「one life one love」（爱你一世）？投资目的唔系赚取10％到20％利润，而系点样double或triple你嘅资金。鲨鱼称霸系因为攻击力强（咬你一啖唔死都残废），狮子称霸系一击致命，反而牛羊食草先至系细细嚼慢慢咽，海中虾毛才啄啄吓。过去五年我老曹曾每天花半小时以上时间尝试将一名散户训练出大户嘅性格，最后失败收场，因此不得不承认「old habit dies hard!」。其实牛体形较狮子大，如佢发挥攻击力，狮子未必系佢对手，点解牛往往被狮子吃掉？理由系：一、牛冇勇气，一见到狮子只会逃跑，唔会对抗。二、只会食草，而唔利用自己锋利嘅角去攻击。我老曹不能教一只牛去拥有狮子嘅性格！90％投资者皆拥有牛羊性格，佢地驯良怕事，只管食草；只有10％投资者才有狮子嘅性格，只要加上适当训练，便可以成为良好嘅拣股者（stock-picker）。
成功嘅策略：一、无论市好市淡都唔离市。形势有利时，投资所占比重大D；形势不利时，投资所占比重细D（Stay in the market）。二、入市之前制订自己嘅投资策略，然后天天?到实，一旦出错立即纠正，而唔系买入后揸十年八年便可发达。三、控制自己嘅贪念及恐惧感，以平常心对待得失，「得莫喜、失莫忧」。只管止蚀唔止赚，因投资成功必须严守纪律。股市冇常胜将军，Lose in the battle, Win in the War!喺上落市中，损失小小又如何？不过喺大趋势中一定要胜出。唔好相信密食当三番，赢就赢得大大，输就输小小。四、你有冇做富翁嘅勇气？好多人想发达却冇勇气。你有冇谂过每年将资本升值100％？你有冇谂过赚一百万、一千万、一亿甚至十亿？哗，吓死人咩！啱，你连谂都怕，又点发达？中国人一直过分强调知足常乐，形成中国人野心唔够，唔会做野狼，更加唔会做狮子老虎，因为早已失去冒险精神。五、系投资策略令你致富，唔系股市贴士。散户最喜欢贴士，却唔制订自己嘅投资策略！你说怎么办？今天要致富唔系克勤克俭（如你连原始资本亦冇，才需要克勤克俭），而系来自成功嘅交易（deals）。学习做一个出色嘅 Deal Maker，逃避1997年7月香港楼市回落嘅风险，及利用2001年中国「十．五」计划下引发嘅工业原材料涨价潮。今天嘅美国财长保尔森响去年7月10 日辞去高盛主席前，透过投资中国，不但为高盛证券赚取惊人利润，自己嘅财富亦累积至七亿美元。你响中国「十．五」计划期间又赚咗几多？「十一．五」规划已令去年内地金融股、零售股股价暴升，跟住系乜嘢投资？去年连越南股市及楼价亦狂升，你有冇得着？
利用牛市兴旺壮大自己
5 月份来港上市嘅内地新股有六只，佢地系互太纺织、凯普松、百丽、新华文轩、盈进控股及佳华百货，共集资一百二十四亿元，其中以百丽集资额最大，达七十八亿元。内地公司不断来港集资壮大自己，本港H股亦纷纷回归A股加强资产负债表，大家都利用股市兴旺期去壮大自己。牛、熊市自古存在，成功策略系利用牛市壮大自己，喺熊市持盈保泰减少损失。当一个经济循环完成后，自己已大咗许多！
经济复苏有如食西餐，虽然已食咗头盘、主菜甚至甜品，但餐后酒一样咁精彩！新闻机构宣布高价收购道琼斯，令道指更上一层楼。有人认为饮完餐后酒便会到朱古力！太早离场不但错过餐后美酒，可能同时错过极品朱古力！
太平洋航运（2343）喺高盛证券推介下升8.8％，见八元四角一仙；今年股价已上升70％，高盛证券将目标价由七元二角改为十元，因干货轮收费过去十二个月上升一倍，并估计太平洋航运今年纯利升13％。现今中国造船厂已有能力生产载重四千八百万吨级货船，五年内可生产足够货船应付中国入口煤及铁矿石嘅需求，今年运费可能系另一高潮，但估计到2010年运费回落40％。换言之，航运股短期睇好、中期睇淡。全球最大船经纪公司Clarkson Plc.估计，今年干货轮运费四个月内上升41％，应不能长期保持，并相信今年夏季运费见顶，秋季回落。如中印两国达成铁矿石与煤交易协议，唔排除运费6 月起回落（因中国到印度航程较中国到澳洲短好多），航运股股价唔排除今年年中见顶。
亚洲取代美国成中东原油大买家
中国对石油嘅需求令油价急升，波斯湾国家又将油元投资本港上市国企股（包括汇控）。以沙地阿拉伯为例，60％原油出口（或四百五十万桶一天）嘅目的地系亚洲各国（包括日本、印度及中国等）。亚洲地区早已取代美国，成为中东原油最大买家！
中国同印度已成为工业产品供应国，巴西、俄罗斯等则成为原材料供应者；反观G7喺工业产品供应方面正在萎缩中（最典型例子系日本），响原材料供应方面亦唔见得出色。美国同欧洲央行大量提供信贷创造消费力，维持当地经济繁荣，却同时令资金流向金砖国（BRIC）。上述情况1800年曾响英国、法国、德国、意大利发生；1900年喺美国发生；1950年喺日本同德国发生；近年喺金砖四国发生！欧罗之父蒙代尔预计，2030年中国将取代日本，成为全球第二大经济体系；我老曹估计可能更早！不过过程唔会风平浪静，呢点亦要小心。
日本今年3月份出口贸易顺差较去年同期上升73.9％。中国已取代美国，成为日本第一大贸易伙伴。日本出口额上升10.2％，为七万五千一百亿日圆；进口五万八千八百亿日圆，同去年同期持平，顺差一万六千三百亿日圆（折合一百三十七亿八千万美元）。日本对中国出口上升15.1％，至一万一千二百亿日圆；进口则减少，出现三年内第一次顺差。2002年日本GDP增长其中 38％来自中国，去年已升至68％。中国经济快速增长，系日本出口增加嘅最大理由。去年日本对中国出口九百二十七亿五千万美元，较2005年上升16％；入口一千一百八十三亿四千万美元，上升9％；逆差二百五十五亿九千万美元，下降10.3％。中国占日本外贸比重17.5％（美国占17.2％），估计今年日本对中国贸易出现顺差。
八十年代日本企业投资点系珠三角一带，同港资及台资合作利用当地廉价劳动力，为日本电子产品加工后再出口。九十年代开始日资大量投资长三角，目的已唔系加工后再出口，而系加工后向中国市场推销，利用上海进军中国市场。同珠三角唔同，因邻近香港，加上懂日语嘅人才好少，形成珠三角产品以外销为主；长三角一带位于华中，对日本产品进军中国好有利，加上懂日语嘅人才供应充足，有助日本企业开拓中国市场。咁渐渐形成珠三角电子及汽车零件以外销为主，长三角电子及汽车零件以中国本土为市场。
4月份内地全国楼市收益综合指数6642点，较3月底嘅7015 点出现5.32％回落；较大城市加权指数收6272点，较3月收7109点低11.78％；大城市房价所受下跌压力较二线城市大。北京出现首次回落，广州及上海亦面对回落压力，其次系厦门、福州及深圳等东南沿海地区房价出现较大波动。
去年广州商品房价上升22.4％，成为全国嘅领头羊之一；今年3月政府公布房价每平方米下跌七百元，但亦有人话中心城区房价已超过一万元一平方米！官方公布平均每户拥有一点○六套住房，住房自有率达90％。到底真实情况系点？局外人难了解，明年起九十平方米以上单位供应量减少，亦有人趁今年细屋搬大屋。到底官方数字有几可靠？不得而知。
消失一年多嘅排队买楼现象，今年3月喺上海多个新楼盘开盘当日又再出现，小阳春又再重临上海市，3、4月份日销量已由从前二、三百套，上升至五、六百套。 5、6月份九十平方米以下小户型住宅将大量上市，上海楼市到底系小阳春抑或系全面反弹？关键要睇6、7月份。依家供应量大系外环线以外，内环以内仍偏少，购楼者以自住为主，估计难以扩散。
内地全民皆股，唔少人发现炒房子唔及炒股票头寸进出灵活，利润空间大，好多内地人4月份已唔再买房子，而将资金投入股市玩一玩。天天睇「天花板」有乜意思？不如天天睇「股市行情」。内地楼市嘅吸引力已被股市取代。
五一黄金周到农村游玩嘅城市游客今年大幅增加。唔少市民怀住回归大自然、感受大自然嘅愿望，到各大乡村旅游点试试住吓农家屋、食农家饭、干农家活，享受农家乐，成为今年五一黄金周嘅特色。上述改变肯定对本港旅游业不利，香港旅游业协会应该多D宣传香港观鸟区或湿地公园，以吸引呢类游客，再唔系嗰D廉价购物团。
信报财经新闻 曹仁超2007-05-04
页:
[1]