投资者日记 唔好跟我买！
投资者日记 唔好跟我买！3月26日，周一。恒生指数升73.21，收19765.85；成交三百九十八亿六千零八十三万八千元。3月期指升61点，收19760点。
油价上升，令中石油（857）升1.8％，报八元九角四仙；中海油（883）升0.9％，报六元五角三仙。《金融时报》报道，中芯国际（981）可能向策略投资者出售股权，集资五亿美元，令股价上升11％，报一元一角四仙。
花旗推介富力地产（2777），目标价十九元三角八仙，估计今年每股获利一元零四点五仙，纯利再升50.8％，未来O十五点七倍；同时推介国浩（053），目标价一百一十三元。股市继续流行炒个别发展。
OPEC成功令油价止跌
OPEC 2月份减产一百万桶一天，系近十年内减幅最大嘅一次，令油价由二十个月低位反弹25％，由五十美元重返六十美元之上，达到OPEC嘅要求。3月15日会议后，OPEC决定维持现水平石油产量，六个月后再开会。亚洲金融风暴后，油价喺1998年12月21日一度跌至十二年低位十点三五美元，其后OPEC一再减产去阻止油价跌穿十美元，油价开始爬升。今年OPEC成功阻止油价低于五十美元，至于能否长期保持油价响六十美元之上？有待观察。有一点可以肯定嘅系，低能源时代已离我我地好远好远矣！
1971年美元同黄金脱钩后，整个七十年代投资大方向系炒美元贬值；1979年年底雪茄伏上台，将利率提升至CPI增长率二厘以上，才成功控制住通胀。1978年中国政府开始背离共产主义制度，走自由经济路线，上述情况为全球经济带来近二十年繁荣期。小插曲系亚洲其它国家因竞争力唔及中国，喺1997年7月起纷纷宣布货币贬值，引发1997年8月亚洲金融风暴，其后亦由联储局减息应付过去。2000年美国经济盛极而衰，格老透过减息创造信贷，阻止经济衰退响美国出现。因世界资源已无法应付资金泛滥所产生嘅新需求，令资源价格上升。去年系咪另一改变？虽然中国「十一．五」规划决定走节约型经济，但至今未见成效。至于今年2月美国次级按揭债券市场恶化，亦系另一令人心惊惊嘅隐忧。 全球生产力过剩，令各行各业毛利率下降（甚至消失），金融市场则由信贷泛滥支持，喺高位牛皮，最后何去何从？真系木宰羊。商品牛市已完成咩？美国物业市场会点？中国经济转型成功咩？一连串问题都冇肯定答案。此所以踏入2007年股市咁波动，2007年亦系我老曹最睇唔清方向嘅一年。
升市莫估顶又一明证
沪深A股指数再创新高，但今年1月起已同RSI走势背驰【图】，代表呢次沪深A股升市唔会持久，或迟或早出现另一次抛售潮（会否出现三浪背驰？喺唔成熟嘅股票市场，走势准确性较成熟股票市场高）。升市莫估顶又一明证，嗰D认为沪深A股指数见顶者，近日又不知如何解释。今天A股指数受惠于中移动采购3G板块，令相关股份有良好表现，其后系北京奥运板块亦因奥运进入倒数五百天而上升；唔系咁，四元以下股价者都成为炒卖对象，好多垃圾股皆出现鸡犬皆升现象。上述情况极之唔合理，唔少股份业绩根本上无法支持依家嘅股价。作为精明投资者，响选股之时不应忽视公司业绩，例如公司经营状况、系咪行业龙头股等；反之，所谓3G概念、奥运概念所引发嘅股价刺激，相信好短暂。 1978年中国实施改革开放政策后，中国走上工业化之路，一如香港由1950至80年嘅情况一样。呢段日子已渐渐完成，中国经济已进入「后工业化」之路，即由投资及消费渐取代工业及出口，成为带动经济继续增长嘅动力。八十年代香港喺转型方面得天独厚，令1984至97年香港经济进入由内部消费带动嘅另一次繁荣期。去年中国「十一．五」规划嘅目的系协助中国经济由前工业化转入后工业化时代，但中国嘅道路崎岖好多。
今年中国外贸盈余估计高达二千亿美元，资金泛滥情况超过1984至97年嘅香港。去年中国GDP增长率高达10.7％，系1995年以来最快；外贸盈余高达一千七百七十五亿美元。人行虽然一再加息兼提升银行存款保证金率，似乎一D效用都冇。2月份L货币供应增长率仍高达17.8％，L2增长率17.2％。中国七十个主要城市2月份楼价较去年同期升5.3％（深圳升9.9％）；沪深指数今年3月较去年同期升160％！估计人民币6月前仍会再加息，但作用有几大？中国会否一如八十年代日本经济，要经历一次boom & bust？上述系好多专家提出嘅问题，但冇人可以有肯定答案。 中国楼市渐渐两极化。今年2月底止北京朝阳区现楼平均价一万三千一百三十三元一平方米，较去年同期升三千九百零八元，涨幅达42.4％！全球豪宅皆愈来愈贵，上述已非香港特有现象。
内地亦掀起移民潮
1996年前移民加拿大及澳洲者，以港人及台湾人为主；1996年之后，中国人渐成主流。来自大陆嘅移民，大部分系学历低、年龄大、地域性强嘅新发财，属来路不明嘅有钱阶层。呢批移民过去以中国东南沿海一带为主，尤其系福建人，大多喺五十岁左右、学历普遍偏低但敢于冒险，唔少靠倒卖或承包嘅经营方式赚取财富；近年移民潮开始蔓延到上海、江浙甚至中国中西部。过去移民以个体户及小企业主为主，近年多咗大企业股东甚至CEO群体，学历开始向上移，年龄开始往下走。大部分移民喺国内所做嘅生意唔大，一般先把妻子及子女安排到海外，响嗰度买屋买车，子女接受当地教育，自己回国做生意，赚到蚊年到海外去。一如八、九十年代香港嗰批移民一样，呢批小企业主只能响两国之间游走，飞来又飞去，有时亦带自己孩子及妻子回国度假，更多时候系倾电话同e-mail。
过去发生喺香港移民身上嘅事，依家同样喺中国移民身上发生，就系当家庭生活及事业开始分裂后，渐渐一家团聚日子减少，问题便出现。呢批移民，无论喺加拿大或喺中国境内都算较富裕嘅一群，虽然资金来源不尽相同。港人当时移民理由系怕九七回归，呢批中国人则认为中国政府对私有产权嘅保护仲系好脆弱，觉得拥有一定资产后，都系移民海外更有保障，移民后再唔使担心政治事件。另一个现实系自己嘅事业仲喺内地，如离开内地，自己嘅事业便完蛋，结果大部分家庭都系妻子及子女先入籍，自己仍保留中国人身份，留响中国做生意。形成一个家庭成员分别喺两个国家境内，许多家庭悲剧亦由此发生！2005年移民加拿大嘅中国人共三万六千四百一十人（包括经济移民及家庭团聚移民两大类，系加拿大各国移民人数之首！），最近中国政府通过《物权法》，会否减少国人「经济移民」出国？家吓最多人移民海外系浙江温州市，人口七百五十万，其中有五十万人已移民海外（相信1997年香港亦好厉害，只系冇准确数字，估计亦有唔少于五十万移民海外）。
中国人要移民外国？此乃中国人嘅悲哀。但愿有一天中国人毋须再因为担心政治问题而移居海外。
不管你做乜嘢事，良好习惯都系决定你成败嘅重要因素。理财亦一样，好多人认为富向险中求，其实系一个足以致命嘅错误观念。1974年我老曹亦相信上述观念，差D被害死，依家明白逃避风险才最重要。例如1997年逃避香港物业大跌市、2000年冇沾手TMT股泡沫。我老曹认为，保本永远较增值重要；失败嘅投资较唔投资损失更大！
糊胡涂涂赚钱跌市输突
投资成败并非由你拥有几多蚊年去决定，而系取决于你嘅智慧同眼光。少赚胡涂钱！好多人糊胡涂涂地投资，喺牛市中糊胡涂涂地赚钱者绝不少数，只系一旦面对跌市，通常都系输突。跟风最唔好，我老曹讨厌别人连谂都唔谂便信你。例如去年年中我老曹喺研讨会上公开睇好内地金融股，至于买边只？投资者应自行决定。仍然有唔少散户要求我老曹畀个冧巴便信晒你！通常我老曹都唔响应，因为责任太大也，有边个知道未来风险系点？我老曹连自己亦唔信，你地咁信我，我跳楼都唔掂。唔好跟我买，应睇完本栏文章后自己去思考分析，做自己金钱嘅主人，承担自己必须承担嘅风险。万一形势不利便行使止蚀盘保护，绝对不可跟我买！
养成良好习惯，一生受用。如果跟我买，我老曹睇错怎么办？入市之前未谂止蚀位响边嘅人，迟早损失惨重离场。唔好奢望自己一天暴富，如你能令资本每年增值15-20％，已经十分了不起（每年升值20％，以十万元开始，三十年后你已拥有二千三百七十多万元）。
信报财经新闻 曹仁超2007-03-27
页:
[1]